អាទិភាពដំបូងដែលសាលាត្រូវធ្វើគឺពិនិត្យកំរិតភាសាទាំងពីររបស់សិស្សមុននឹងវាយតំលៃថាពួកគេប្រើប្រាស់បានយ៉ាងស្ទាត់ជំនាញ ។ សិស្សខ្លួនឯងក៏ត្រូវប្រឹងប្រែងរៀនសូត្រទៅតាមកំរិតរៀងៗខ្លួនផងដែរ ។ ដូច្នេះពួកគេតំរូវអោយយល់ពីការណែនាំ ទំនាក់ទំនងផ្ដោះប្ដូរជាមួយគ្រូ និងចូលរួមកិច្ចការជាក្រុម ការលេងកំសាន្តរួមថ្នាក់ជាដើម ។

សាលាក៏បានបង្កើតវគ្គសិក្សាពិសេសសំរាប់សិស្សដែលត្រូវការរៀនបំប៉នភាសាបារាំង រឺអង់គ្លេស ដើម្បីអោយពួកគេអាចរៀនបន្ថែមនិងមានកំរិតគ្រប់គ្រាន់តាមតំរូវការ :

• ប្រសិនបើសិស្សនិយាយភាសាអង់គ្លេសបានល្អហើយតែមិនមានកំរិតគ្រប់គ្រាន់សំរាប់ភាសាបារាំង អីចឹងខណ:ពេលជាក់លាក់ណាមួយក្នុងមុខវិជ្ជាភាសាអង់គ្លេស គ្រូភាសាបារាំងនឹងនាំគាត់ចេញពីថ្នាក់ទៅរៀនបំប៉នបន្ថែម ។ 

•  ប្រសិនបើសិស្សនិយាយភាសាបារាំងបានល្អហើយ តែមិនមានកំរិតគ្រប់គ្រាន់សំរាប់ភាសាអង់គ្លេស អីចឹងខណ:ពេលជាក់លាក់ណាមួយក្នុងមុខវិជ្ជាភាសាបារាំង គ្រូភាសាអង់គ្លេស​នឹងនាំគាត់ចេញពីថ្នាក់ទៅរៀនបំប៉នបន្ថែម ។ 

• ក្នុងស្ថានភាពខ្លះគ្រូនឹងចូលមកក្នុងថ្នាក់រៀនដើម្បីពិនិត្យមើលដោយផ្ទាល់ និងផ្ដល់ជាកំលាំងចិត្តដល់សិស្សផងដែរ ។
• សិស្សដែលរៀនបំប៉នភាសាបារាំង រឺអង់គ្លេសជាទូទៅមិនតំរូវរឺណែនាំអោយរៀនភាសាទីបីភ្លាមទេ ដើម្បីអោយពួកគាត់មានពេលវេលាគ្រប់គ្រាន់ពង្រឹងភាសាដែលចាំបាច់ជាមុនសិន ។

ជាទូទៅនៅពេលចុះឈ្មោះចូលរៀនដំបូងប្រសិនបើលោកគ្រូ អ្នកគ្រូសំគាល់ឃើញថាកុមារមានតំរូវការពិសេស នោះពួកគាត់តែងតែរកដំណោះស្រាយបានភ្លាមតាំងពីដើមឆ្នាំសិក្សាទៅ ។ រោគសញ្ញានេះតែងតែរកឃើញបន្ទាប់ពីកុមារចូលរៀនបានមួយសប្ដាហ៍ ។ 

នៅចុងខែកញ្ញាបន្ទាប់ពីបើកបវេសនកាល និងរយះពេលសម្របខ្លួនបានកន្លងផុតហើយបន្តិចនោះ គណ:គ្រប់គ្រងអប់រំសាលាជាមួយនឹងលោកគ្រូ អ្នកគ្រូចាប់ផ្ដើមពិនិត្យវិភាគលើកុមារម្នាក់ៗហើយបើមានករណីពិសេសណាមួយកើតឡើងខាងសាលានឹងរៀបចំអោយមានការជួបគ្នារវាងគ្រូ និងគ្រួសារសិស្សដើម្បីពិភាក្សារកដំណោះស្រាយល្អស្របតាមតំរូវការរបស់កុមារ រឺក៏ណែនាំអោយជួបជាមួយអ្នកឯកទ្ទេសផ្ទាល់តែម្ដង ។